00:30 ОЗҒИН КИШИЛАР ҚАНДАЙ ОВҚАТЛАНИШИ КЕРАК? | |
 Баъзи кишилар жуда озғинликдан, қанчалик яхши овқатланса ҳам семирмасликдан шикоят қилишади. Агар озғин кишининг тана вазни нормадан анча кам бўлса, бунда аввало врач билан маслаҳатлашиш керак. Одам бирор касаллик сабабли ҳам озиб кетиши мумкин. Агар одам соппа-соғ бўлса-ю, аммо семирмаса, бунга доим бир хил овқатланиш, иштаҳанинг яхши эмаслиги сабаб бўлади. Бундай ҳолда энг яхши даво кун тартибини қатъий белгилаб қўйиш, эрталаб, пешинда, кечқурун, доим маълум бир пайтда овқатланишга ўрганиш зарур. Шунда овқатланиш пайти келганда ҳазм ширалари ажраладиган бўлади ва одам қорни очганини сезади. Овқатланишни сабзавотларни ей-ишдан бошлаш лозим, чунки сабзавотларда шира ҳайдаш хусусияти бўлиб, улар одамнинг иштаҳасини очади. Шуни унутмаслик керакки, одам хилма- хил овқатларни еб юрганда вазни нормал бўлади. Бир кунда камида 100 грамм оқсил ейиш керак (балиқ, творог, гўшт, сут, тухум). Агар сизнинг ҳаёт тарзингизда жисмоний меҳнат билан шуғулланиш асосий ўринда бўлса, углеводларни истаганча ейишингиз мумкин. Нон- кондитер маҳсулотлари, макарон, ширинликларни ейишдан қўрқманг, ваҳоланки улар семириб кетган кишиларга тавсия этилмайди. Кунига камида 100 грамм ёғ истеъмол қилиш лозим (маҳсулотлардаги ёғ ҳам шу ҳисобга киради), бироқ овқат жуда ёғли бўлса, иштаҳани қайтаради. Хилма-хил овқатланиш зарурлигини яна таъкидлашга тўғри келади. Шундай ҳам бўладики, одамнинг иштаҳаси яхши бўлади-ю, аммо у доим бир хил таомларни, асосан сабзавот ва бўтқаларни ейди. Бундай одам тана вазнининг нормада бўлиши қийин. Вақтида хилма-хил овқатланишдан ташқари, озғин одамнинг бир оз тўлишиб, тана вазнини нормада сақлаб туришида ҳаракат катта ўрин тутади. Куннинг маълум бир пайтида тоза ҳавода бўлинг: сайр қилинг, чанғи учинг ёки велосипед мининг, ё бўлмаса сувда сузинг. Жисмоний ҳаракат саломатликни мустаҳкамлабгина қолмай, балки кишининг иштаҳасини ҳам очади. Булардан ташқари, ўтириб-туриш (бадан тарбия машқлари қилаётганда) югуриш, чанғи учиш, коньки отиш, велосипед ҳайдаш оёқ мускулларини бақувват қилиш ва мустаҳкамлашда яхши восита ҳисобланади. Агар сиз чексангиз, бундай зарарли одатни тезроқ ташланг. Тамаки ёнганда ҳосил бўладиган никотин ва бошқа моддалар билан организмнинг заҳарланиши фақат юрак, томирлар ўпкага зарар қилиб қолмай, балки моддалар алмашинувига ҳам ҳалокатли таъсир этади ва иштаҳани бўғади. Ниҳоят шуни унутмангки, семириб кетган кишиларнинг озиши қийин, озғин одамларнинг эса семириб, тана вазнини нормада тутиб туриши эса ундан ҳам мушкул. Бу сабр-тоқат ва қатъийликни талаб этади. Manba: tib.uz | |
|
| |
Sayt Menyusi
Bo'limlar
Teglar
Eng ko'p o'qilganlar
Материалов за текущий период нет.
Homiladorlik Taqvimi
Saytdan izlash
So'rovnoma
Saytga Kirish
Hisobot
Reklama